VLUM 31ste Kongres
19 en 20 Augustus 2026 | Olifants River Lodge
Die 31ste VLU Mpumalanga Kongres is op 19 en 20 Augustus 2026 by die pragtige Olifants River Lodge gehou. Dit was twee dae van samesyn, terugvoer, erkenning en natuurlik ook baie pret!
Die dames het hulself behoorlik geniet tydens die “Denim en Diamante”-aand, waar daar heerlik gesing, gelag en saam gekuier is. Dit was ’n spesiale geleentheid om vriendskappe te vier en sommer net lekker saam te ontspan.
Die jaarlikse terugvoer oor die verskillende afdelings is gelewer, met ’n oorsig van die hardwerkende dames se projekte, prestasies en aktiwiteite van die afgelope jaar. Pryse en toekennings is ook uitgedeel om erkenning te gee aan uitstaande prestasies.
’n Belangrike hoogtepunt was die herverkiesing van Mev. Alna Kapp as Presidente van VLU Mpumalanga. Baie geluk, Mev. Kapp! Ons wens u alle voorspoed en seën toe vir die nuwe termyn en sien uit na alles wat onder u leiding bereik sal word.
Die 31ste Kongres was ’n besondere viering van vroue wat saamwerk, mekaar ondersteun en ’n verskil in hul gemeenskappe maak.
Met dankbare harte neem ons afskeid van hierdie besondere kongres, maar ons neem die mooi herinneringe, nuwe vriendskappe en kosbare oomblikke saam met ons huis toe. Mag die gees van omgee, saamstaan en diensbaarheid wat ons tydens die kongres ervaar het, nog lank voortleef. ’n Hartlike dankie aan elke dame wat bygedra het om die kongres so spesiaal te maak. Ons sien uit na nog baie mooi oomblikke saam!

Baie geluk aan Mev Alna Kapp (links) met die herverkiesing as Presidente. Mev Marcelle van Vuuren (regs)